A semana cultural do Concello de Boiro vén esta fin de semana cun amplo abano de experiencias musicais, teatrais e circenses. O programa inclúe catro citas nunha mesma xornada, a do 22 de agosto, en emprazamentos diferentes. Primeiro, está prevista a celebración, nos muíños de Ponte Goiáns, da Muiñada Nunca é Tarde, a partir das 12.00 horas. As persoas que queiran participar na experiencia, que inclúe unha visita aos devanditos muíños de Ponte Goiáns, terán que inscribirse na mesma a través do enderezo cabodecruz@boiro.org (prazas limitadas).
Tamén está programada, a partir das 20.00 horas en Cespón, da cuarta convocatoria do Encontro Tradicional en San Roque co Grupo Abeloura, a histórica agrupación local de música popular galega. Segundo nos conta o Concello, co-organizador da cita, as prazas dispoñíbeis son limitadas e para reservar sitio cómpre poñernos en contacto coa organización a través da conta cabodecruz@boiro.org, antes do venres ás 13.30 horas.
Na mesma xornada do domingo, ás 20.00 horas, haberá un espectáculo de danza no Coído, da man da asociación-agrupación Aroña, que representará Unha noite a beira do rio (actuación prevista para o pasado sábado e aprazada polo mal tempo). As prazas son limitadas, a reserva de sitio debe facerse a través do enderezo electrónico acpedradaarona@gmail.com.
O domingo tamén será a quenda do grupo de rock boirense Triángulo de Amor Bizarro. A cita será na praia da Pesqueira de Cabo de Cruz, ás 20.00 horas do sábado 22. Trátase dunha das catro actividades programadas na iniciativa Paisaxes Sonoras que promove a mancomunidade Barbanza Arousa. As entradas están esgotadas.
Ao día seguinte, luns 23, celebrarase unha Gran Gala de Circo diante das escaleiras da Casa da Cultura, a partir das 21.30 horas. Trátase dun espectáculo de cabaré, novo circo, acrobacias e humor a cargo da compañía Pistacatro. A reserva de entradas para o espectáculo pode facerse no enderezo electrónico cabodecruz@boiro.org antes das 13.30 horas do luns ou no mesmo momento do espectáculo por orde de chegada.
