A Conselleira de Infraestruturas e Mobilidade en funcións, Ethel Vázquez, visitou hoxe as melloras acometidas na estación de autobuses de Noia. A conselleira explicou que, avalado polo Instituto de Seguridade e Saúde Laboral de Galicia ( ISSGA), redactouse un protocolo que será abordado nunha reunión coa patronal esta semana, segundo precisou.
Declarou que a Xunta trasladou ás empresas e aos sindicatos o protocolo de prevención fronte á Covid-19 no autobús compartido para dar “seguridade” aos usuarios antes do inicio do curso.
A conselleira explicou que estas normas, ademais das medidas comúns, incorpora medidas específicas para o autobús compartido como a separación dos asentos dos escolares dos que empreguen o resto de usuarios, reservando as prazas dianteiras para as persoas maiores.
Tamén se introducen normas para o acceso e baixada de autobuses, sempre pola parte dianteira. Os escolares ocuparán as prazas de atrás cara adiante e, na medida do posible, sempre no mesmo asento.
Ethel Vázquez realizou estas manifestacións na visita ás obras na estación de autobuses de Noia, unhas melloras que supuxeron un investimento de máis de 270.000 euros. Estes traballos súmanse aos realizados en 2017 nesta mesma estación.
