O vindeiro sábado 22 de agosto a sala Arcos Moldes do Auditorio de Rianxo acollerá un concerto do grupo Barahúnda, agrupación do Barbanza integrada por Helena de Alfonso (voz e composicións), Jose Lara Gruñeiro (guitarras e composicións), José Luis do Pico Orjais (multi-instrumentista) e Txema Mawenya (percusión). Na actuación, prevista para as 22.30 horas e abeirada ao ciclo Música na Noite, a devandita formación de Barahúnda estará acompañada de José Nine, Isabel Rei Samartim e Raúl Lojo. A banda, activa dende 1998, homenaxea a rica tradición lírica e musical galega nas súas moi variadas manifestacións, alternando composicións propias con letras de poetas actuais ou da tradición galego-portuguesa.
Segundo informa o Concello de Rianxo, as prazas achegaranse con reserva previa. Esta pode formalizarse a través de no correo-e auditorio@concelloderianxo.gal ou no teléfono 664 183 217, do 10 ao 21 de agosto. Cómpre que indiquemos o noso nome completo, o teléfono e a cantidade de convivintes para os que se solicitamos reserva. Esta farase efectiva cando se confirme desde o Auditorio.
