O alcalde boirense José Ramón Romero, e a concelleira de Cultura, María Outeiral, recibiron na mañá deste 18 de agosto aos nenos e nenas que participan no campamento urbano de verán que organiza o Centro Cultural e Deportivo de Boiro. No salón de plenos tiveron a oportunidade de transmitir ao alcalde e á concelleira as súas demandas e suxestións para o termo municipal.
A comitiva estivo integrada por arredor de 15 crianzas de cursos de infantil e primaria. Na súa estadía no Concello puideron coñecer o funcionamento do mesmo e o seu día a día, amais de de presentar as súas solicitudes e demandas, familiarizándose cos procesos administrativos e mesmo tendo a oportunidade de facer un trámite concreto: o cumprimentado do seu propio modelo de instancia para entregar no Rexistro Xeral.