A deputada no Parlamento Galego, Rosana Pérez, responsábel no grupo do BNG das actividades pesqueiras e marisqueiras e da zona Barbanza – Muros – Noia, visitou este xoves 20 de agosto os almacéns do Museo do Mar de Noia, co fin de coñecer de primeira man o relevante traballo levado a cabo nas últimas décadas pola Asociación Mar de Noia. Precisamente, na xuntanza con Rosana Pérez participou o presidente da entidade, Félix González, o portavoz local do grupo nacionalista en Noia, Ricardo Suárez, e outros membros da dita asociación.
A deputada, na súa visita, tivo coñecemento tamén do labor despregado polo Museo do Mar de Noia na posta en valor da historia e a etnografía marítima. Pérez tivo palabras críticas coa Administración local, pola “súa falta de interese na conservación do material acubillado nas instalacións” e mostrou a disposición de levar preguntas e propostas ao Parlamento no caso de que o Goberno local de Noia “non leve a cabo máis cedo que tarde os seus compromisos ao respecto”.
Pola súa parte, Suárez reafirmou o desacordo da agrupación local do BNG co feito de que que a primeira actividade levada a cabo no novo edificio do Museo do Mar “non teña como protagonista á etnografía e a historia marítima de Noia e a ría”.
