A agrupación Rianxo en Común vén de solicitar ao Concello cumprida información sobre a convocatoria deste ano da Festa da Xouba. Segundo fai saber a plataforma que coordina Julián Bustelo, esta festividade rianxeira celebrarase dentro dunha semana e, malia as transformacións que desencadeou a COVID, ás que houbo que adaptarse de urxencia, “descoñecementos os plans do Goberno local de cara a esta data”, sinalan.
E engaden: “Desde Rianxo en Común pensamos que as limitacións e recomendacións sanitarias que debemos seguir todas para evitar novos brotes de coronavirus preséntanse como unha oportunidade para repensar o formato da Festa da Xouba tal e como vimos defendendo nos últimos anos”.
A agrupación propón unha celebración adaptada na que os protagonistas sexan, amais do produto, “os establecementos de hostalería”, e, tamén, “unha Festa da Xouba centrada na posta en valor do xeito, do traballo do mar, do produto de proximidade e de Rianxo como sinónimo de todo o anterior”. A agrupación mantivo recentemente unha xuntanza con representantes da hostalería local para facerlles chegar o programa específico que reivindica.
