O Concello de Rianxo e a Subdelegación do Goberno da Coruña formalizaron a incorporación da Policía Local deste municipio da nosa comarca ao sistema Vioxen para a loita contra a violencia de xénero, segundo acordou a Xunta Local de Seguridade reunida baixo a presidencia do alcalde Adolfo Muiños e a subdelegada do Goberno, Pilar López-Rioboo.
Segundo informaron, a Xunta Local de Seguridade aprobou o protocolo de convenio que logo será será asinado polo Concello co Ministerio de Interior para regular a presencia da Policía Local no sistema Vioxen. Ademais, este protocolo asinado inicialmente polo alcalde e a subdelegada será remitido ao Ministerio para “a súa validación e posterior sinatura” por parte do Director Xeral do Ministerio de Interior e facer efectiva desta maneira a participación de Rianxo neste operativo.
Detalles do sistema
O sistema Vioxen permitirá á Policía Local dispoñer de máis información sobre todos os casos activos de violencia machista, “de tal maneira que os propios policías locais pasan a asumir o seguimento e control dalgúns destes casos, xeralmente daqueles que sexan considerados de nivel de risco baixo ou leve, mentres que a Garda Civil encárgase do seguimento dos casos máis graves”, engadiron.
Este protocolo establécese trala creación da Mesa Local de Coordinación Policial na que están presentes a Policía Local e a Garda Civil e que ten como finalidade principal integrar esforzos na loita contra a devandita lacra da violencia.
Pilar López-Rioboo fixo saber a Adolfo Muíños o seu agradecemento “polo esforzo realizado no desenvolvemento das políticas de igualdade e de loita contra a violencia de xénero, tal como se evidencia nas medidas adoptadas e que culminarán coa incorporación da Policía Local ao sistema Vioxen”.
Unha redución do 14% da violencia en Rianxo
Amais dos devanditos detalles sobre Vioxen en Rianxo, os representantes das Forzas de Seguridade do Estado informaron da evolución estatística da seguridade cidadá no municipio. Segundo comunicaron, nos primeiros seis meses deste ano houbo unha redución do 14% nos delitos, “se ben esta porcentaxe ten que ser considerada dentro do excepcional estado de confinamento existente nos meses de marzo, abril e maio nas súas distintas fases do Estado de Alarma”.
En conclusión, a proxección do índice de criminalidade no concello neste ano 2020 sitúase en 17,94 delitos por cada mil habitantes, o que representa sete puntos inferior ao rexistrado en 2019, moi lonxe da media provincial, de 31,8 delitos por mil habitantes.