Os concellos do Xeodestino Ría de Muros e Noia distribúen máscaras que certifican a seguridade turística da contorna

Presentación das máscaras nunha imaxe de El Correo Gallego

O alcalde do Concello de Noia, Santiago Freire Abeijón, e a presidenta do Xeodestino Ría de Muros e Noia, Teresa Villaverde, reuníronse estes días para certificar a calidade turística da contorna e o altamente capacitados que están os seus establecementos para achegar a máxima protección aos viaxeiros e visitantes fronte á COVID. Amais, presentaron unhas novas máscaras coa lenda Ría de Muros Noia, Destino #Seguro, coas que poñen o colofón ao labor de asesoramento e fornecemento de elementos de sinalización a máis de 130 establecementos do xeodestino, integrado por cinco termos municipais.

As máscaras, que xa están a disposición dos visitantes nas oficinas de turismo da contorna (e nos museos e centros de interpretación), representan a resposta positiva e decidida da Ría de Muros e Noia e o seu sector hostaleiro e turístico fronte á crise sanitaria e as súas graves consecuencias. En concreto, as máscaras pódense adquirir no punto de información das Minas de San Finx (Lousame), na Oficina de Información Turística de Muros e no Muíño do Cachón (Muros), na oficina de información do xeodestino emprazada no Casino de Noia, na Oficina de Información do Centro de Actividades Náuticas do Freixo (Outes) e na Oficina de Información do Castro de Baroña e no Museo Marea (en Porto do Son).