O Concello de Boiro habilitará este domingo 12 de xullo varias áreas de estacionamento específicas con tempo limitado para facilitar o acceso seguro aos colexios electorais da cidadanía, máis polo miúdo aos colexios de Boiro e Cabo de Cruz. Estas prazas de aparcamento, lindeiras ao polideportivo de A Cachada e ao Centro Social de Cabo de Cruz, teñen un tempo máximo de estacionamento de 20 minutos.
Con intención de “favorecer a rotación de vehículos e limitar o tempo de permanencia nos colexios electorais”, o Concello habilitará as prazas en horario de 9.00 e as 20.00 horas. Serán, como dixemos, de uso limitado. Porén, achegarán tempo de abondo para asistir aos colexios e exercer o dereito ao voto. Ao igual que nos últimos comicios, as persoas con mobilidade reducida van poder estacionar diante da porta de acceso ás instalacións.
Desde o Concello de Boiro búscase favorecer as maiores comodidades durante a xornada electoral e evitar as aglomeracións nos colexios. Tamén recomenda á veciñanza que siga as recomendacións dos representantes da administración e medidas de hixiene para garantir a seguridade.
