O equipo de golf de CONGALSA que lidera Aurelio González proclamouse este fin de semana campión na segunda categoría absoluta da liga de Empresas promovida por Barbanza Golf. A competición reuniu a 105 xogadores repartidos en 15 equipos, entre eles os oito que conforman o cadro que patrocina a empresa de produtos de alimentación do mar da Pobra do Caramiñal.
Os dous primeiros clasificados ao abeiro das catro categorías impulsadas na liga de Empresas recibiron o sábado os seus premios.
CONGALSA, con motivo desta importante vitoria, lembrou un dos seus grandes obxectivos locais en materia de política de Responsabilidade Social Corporativa (RSC): promover, apoiar e participar en diferentes torneos e competicións deportivas na área do Barbanza. De feito, puxo o foco na súa participación (patrocinándoo) no Torneo de Golf do Barbanza, unha competición que ía celebrarse en agosto pero que neste 2020 non se disputará debido á crise da COVID.
