A cultura xacobea local volverá ser a protagonista no Cantón da Leña da Pobra do Caramiñal, o vindeiro 25 de xullo, da man de Serafín Marcos. Estamos a falar dunha nova sesión das visitas teatralizadas do coñecido artista noiés, un dos grandes expertos nas orixes da vila do Caramiñal e máis en concreto das súas vertentes ligadas aos Camiños de Santiago, que son a cerna dos seus variados espectáculos históricos (amais doutros aspectos sobre o pasado da localidade). A cita, organizada polo Concello, será ás 22 horas.
Co fin de garantir a máxima seguridade dos asistentes, será obrigatorio uso de máscara. O Concello lembra que en caso de chuvia, a visita guiada realizarase no auditorio do Museo Valle-Inclán. O espectáculo será de balde até se completar a cabida máxima permitida. Forma parte do programa O Teu Xacobeo, financiado pola Xunta e maila Concellaría do Turismo da Pobra do Caramiñal.