O Concello de Noia activou os días pasados un novo dispositivo de retirada de vertidos incontrolados en diferentes puntos do termo municipal, un problema de civismo e risco medio-ambiental que se viu agravado, como en moitos outros concellos da nosa contorna, pola emerxencia sanitaria (o remate do confinamento, coloquialmente falando, desatou condutas incívicas nalgúns veciños que durante a reclusión se mantiveron en certa media baixo control). A retirada de refugallos levouse a cabo en Santa Cristina de Barro e centrarase tamén no Obre, onde apareceu outro punto de vertido.
Segundo informou o Concello, “trátase de situacións que se repiten periodicamente por culpa duns poucos e a pesar da existencia tanto dun servizo de recollida de voluminosos como dun punto limpo para a reciclaxe deste lixo”.
Diante desta situación, o concelleiro de Medio Ambiente, Martín Fernández Godón, anunciou a posta en marcha dunha campaña que ten como obxectivo “a erradicación definitiva destas condutas incívicas a través do reforzamento das sancións por parte da Policía Local Noia”.
Tamén aproveitou para pedir a colaboración da veciñanza que “presencie este tipo de ataques ao noso medio ambiente a que presente a correspondente denuncia”.
