O Concello de Rianxo (A Coruña) vén de solicitar a súa adhesión ao programa de compostaxe doméstica da sociedade medioambiental SOGAMA, co obxectivo de “promover a reciclaxe da materia orgánica e orixe” e tirar proveito da mesma. A empresa pública xa subministrou á Administración local 50 composteiros de 390 litros de capacidade e fabricados con materiais reciclados e reciclábeis, a fin de que sexan repartidos entre outras tantas vivendas unifamiliares que dispoñan de terreo no que aplicar o material orgánico resultante.
Con esta iniciativa, o Concello pretende “recuperar unha práctica tradicional no rural galego como é a segregación dos restos orgánicos para alimento do gando e/ou elaboración de compost”. Esta práctica verase fortalecida e mellora coa dispoñibilidade dos acubillos específicos, que propiciarán un proceso de fermentación máis controlado, hixiénico e cómodo.
Co obxectivo de que os usuarios dispoñan dos coñecementos necesarios para aplicar a técnica con garantías, recibirán un curso de formación a cargo de persoal de SOGAMA, así como manuais didácticos de apoio nos que se explican os pasos a dar: desde o propio emprazamento do composteiro (que debe estar nunha zona sombreada, protexida do vento e en contacto coa terra para facilitar a entrada de microorganismos descompoñedores) até a relación de materiais que deben e non deben depositarse no mesmo, control de parámetros esenciais tales como a temperatura, o osíxeno e a humidade, e aplicacións do compost resultante, un abono de alta calidade con excelentes propiedades fertilizantes para o solo.
As persoas interesadas dispoñen de información adicional no sitio web www.compostaconsogama.gal, onde poñerán atopar recursos divulgativos e lúdicos complementarios.
A día de hoxe, un total de 351 entidades atópanse adscritas ao programa de compostaxe doméstica de SOGAMA, tendo repartido entre as mesmas 14.000 composteiros.
