O Concello de Ribeira abriu o prazo de presentación de ofertas para os traballos de arranxo e pavimentado dun novo tramo do Polígono Industrial de Xarás (concretamente, na avenida Ramiro Carregal Rey) coa fin de incrementar a seguridade viaria (achegarase pavimentado na estrada e beirarrúas novas, a día de hoxe construídas en formigón en masa e, segundo confirma o Concello, bastante deterioradas, ao igual que a calzada).
Os servizos técnicos elaboraron un proxecto técnico que inclúe o pavimentado das beirarrúas mencionadas cunha capa de formigón de 15 centímetros de espesor cun mallazo de 15×15 centímetros de 6 milímetros de diámetro, en tanto que a calzada será asfaltada con aglomerado en quente. Os traballos concluirán co pintado da estrada.
A actuación comporta un investimento de 116.528 euros, dos cales o 80% (92.223 euros) proceden dunha subvención da Consellería de Economía, Emprego e Industria da Xunta de Galicia para a habilitación e mellora de infraestruturas para parques empresariais que hoxe o departamento autonómico comunicou ao Concello.
As empresas interesadas en participar na licitación dispoñen ata o 18 de agosto á media
noite. Poden formular as súas ofertas a través do Sistema de Licitación Electrónica da Xunta de Galicia (SILEX).