O xulgado do contencioso-administrativo número 2 de Santiago de Compostela emitiu este martes un auto no que ratifica a medida adoptada pola Consellería de Sanidade e acorda o illamento e a corentena obrigatoria dun núcleo familiar formado por unha parella e a súa filla menor de idade, infectados pola COVID-19.
O pasado luns, 6 de xullo, Sanidade tomou a decisión de que esta familia estea confinada en Ribeira ata que deixen de representar un risco para a saúde pública.
Segundo o Tribunal Superior de Xustiza de Galicia, a prolongación desta medida dependerá do ditame do Servizo de Medicina Preventiva do Hospital Clínico Universitario de Santiago de Compostela.
O maxistrado indica que a resolución adoptada pola Xunta está xustificada, respectando o principio de proporcionalidade que resulta da doutrina do Tribunal Constitucional. Ademais, resalta que é “adecuada”, pois sostén que “non consta a posibilidade dunha medida menos gravosa ou lesiva para a consecución do obxectivo proposto”.