Este domingo celébranse as eleccións autonómicas en Galicia e Euskadi, en plena crise sanitaria como consecuencia do Covid-19, aínda que para algúns políticos chámase a “nova normalidade”. Moitos expertos sanitarios, científicos, investigadores así como algúns responsables políticos e unha boa parte da cidadanía considera que non era o momento máis adecuado para convocar a poboación ás urnas. É obxectivamente certo que, nesta ocasión, hai moitos miles de cidadáns que decidiron optar polo voto por correo pero tamén é certo que un número importante de cidadáns, principalmente as persoas de risco ou persoas maiores de 65 anos, están a pensar en quedarse na casa por precaución ou simplemente por medo, que é algo inherente ao propio ser humano. Hai preguntas que terían que ter resposta, por parte dos nosos gobernantes autonómicos. Se hai un rebrote importante, de quen sería a culpa?. Se hai unha abstención alta, maioritariamente superior a outras ocasións, quen sería os responsables e a quen beneficiaría?. Certamente que unhas eleccións libres son sempre unha festa para a Democracia pero, nesta ocasión, oxalá non teñamos que lamentar un maior número de contagios ou a perda de vidas humanas. Os dirixentes políticos e as súas formacións non terían que moverse por intereses partidistas, en situacións como as actuais e máxime coa cantidade de mortes de inocentes que xa se quedaron polo camiño. Unicamente teríalles que preocupar o interese xeral e o benestar de todos os cidadáns, independentemente das súas ideoloxías. Pois a votar, con precaución e con “ sentidiño”, e os que desexen quedarse na casa que queden, exercendo o seu dereito á liberdade individual.
