Esta fin de semana, Rianxo será máis ca nunca unha vila histórica. O motivo? A celebración dunha nova edición, a número dezaseis, do Encontro Internacional Zona de Zanfona (ZdZ), o festival que organiza cada ano na vila rianxeira aCentral Folque en colaboración co Concello (Área de Cultura). O encontro achégase como unha nova experiencia músico-histórica, adaptada á nova realidade de seguridade sanitaria, sobre a zanfona e os tempos nos que este instrumento reinaba en todos os panoramas musicais, dende os máis rexios até os populares. Haberá cursos, clases maxistrais e concertos. O Auditorio de Rianxo será o centro de operacións.
Como dixemos os días pasados, a nova edición de Zona da Zanfona terá unha programación especial para cumprir cos protocolos de sanidade, hixiene e distanciamento físico que a situación require mais que non “desatenderá ás actividades fundamentais do seu programa”, informou a organización. A previsión é xuntar novamente músicos especialistas no dito instrumento e ofrecer unha destacada axenda concertos, cursos e convivios arredor da zanfona. A programación deste ano pivota sobre tres eixos: concertos de balde, cursos de aprendizaxe e actividades online (en inglés para audiencias non presenciais).
Segundo engaden dende aCentral Folque, os concertos atenden a un criterio de especialización (o virtuoso Efrén López e as músicas mediterráneas, que actúan o venres 3 no Auditorio, a partir das 22.30 horas), do popular (o repertorio tradicional galego do dúo Sobre Rodas -que actúan o venres ás 22.30 horas- e a dramaturxia de Os Monifates -que estarán no Auditorio o sábado 4 ás 22.30 horas) e das novas expresións recreadas (o trío É Romance sobre o romanceiro tradicional ibérico, que estarán no Auditorio o sábado ás 22.30 horas).
Esta edición non contará co apartado Palco Aberto, a mostra-exhibición das escolas de zanfona do país.
Os concertos son de entrada libre e este ano deben ser con reserva do billete previa aos concertos, que, ademais, terán o aforo limitado e e contarán con medidas para garantir a distancia física entre os espectadores.
Os cursos de interpretación terán igualmente prazas limitadas. Serán o de iniciación con Óscar Fernández (para o que non se precisa instrumento propio pois empresta a organización) e de especialización con Efrén López.
No capítulo de novidades, o programa achegará un curso de construción de zanfonas, conducido polo artesán Suso Gestal. Así nolo explican dende Folque: “Seguindo os planos achegados en aberto por Jaap e Fay Brand do seu modelo denominado Nerdy Gurdy, a equipa do Zona da Zanfona coa axuda inestimábel de Suso Gestal, desenvolveu un instrumento básico para ser montado nos dous días que dura o curso para asegurar que cada participante leva a casa unha zanfona funcional canda a aprendizaxe do xeito de facela”.
Outra novidade deste ano será o programa da ZdZ Dixital: actividades de divulgación especializada para unha audiencia internacional emitidas por Internet. Será unha aula maxistral con Steve Tyler, zanfonista inglés de longa traxectoria artística e unha palestra sobre cordas históricas e modernas coa canadense Tobie Miller, intérprete especializada en repertorio barroco para zanfona.
A organización tamén recorda que ZdZ continúa coa divulgación de repertorio zanfoneiro coa terceira entrega do Cancioneiro #ZdZ, publicación de acceso gratuíto e descarga libre que pretende ser unha escolma de cancións coas contribucións dos docentes de escolas galegas do dito instrumento para ter un repertorio común de cancións populares e simples para todos os niveis. Este repertorio xa se pode descargar da Rede.
Quen queira consultar os detalles do programa pode facelo na web de aCentral Folque.
