Hai xeitos alternativos de facer turismo e coñecer as máis impresionantes paisaxes, dun xeito tranquilo, seguro e controlado, e os nosos concellos están a argallar métodos para facelo. Neste senso, o Concello da Pobra do Caramiñal ofrece a visitantes e residentes, durante todo o verán, a posibilidade de viaxar en barco, no veleiro Mascato, pola ría de Arousa. As excursións levaranse a cabo até o remate de agosto, os sábados e domingos dende o 18 de xullo até o 30 de agosto.
A iniciativa vén da man da Concellería de Turismo da Pobra, que organiza e co-financia o programa de excursións para coñecer o rico patrimonio medio ambiental e paisaxístico da costa dos nosos concellos.
O traxecto guiado será de 1 hora e 30 minutos, establecéndose as saídas en quendas de mañá e de tarde ás 11:00, 13:00, 16:30, 18:00 e 19:30 horas.
Segundo informa a Concellería, os prezos por persoa son 12€ por persoa adulta e 8€ por nen@ menor de 12 anos. As familias con máis dun neno ou nena terán un desconto. A reserva e compra previa de tíckets débese realizar no punto de información turística da Pobra do Caramiñal. Para máis información cómpre chamar ao número de teléfono 671 090 262 ou escribir un correo electrónico a turismo@apobra.gal.