A Asociación Boirense de Empresarios puxo en marcha unha nova campaña de promoción empresarial para este verán. Na iniciativa, destinada a revitalizar e fortalecer o comercio local (e convidar á cidadanía a participar de cheo no proceso) participan 50 empresas asociadas de todos os sectores: comercio, hostalería, servizos, etc. A ABE sinala que non hai límites en materia de tipo de actividade para ter presenza activa na campaña. Esta, basicamente, consiste na entrega de tarxetas-rasca aos clientes, que poderán gañar algún dos 2.000 premios directos que repartirán os locais adheridos (camisetas, gorras, bolsas de praia e a nova bolsa #sonboiro da ABE de algodón orgánico)
Ademais das recompensas directas, sortearanse 1.000 € en vales de compra.
Os establecementos participantes estarán sinalizados cuns paneis informativos de 1 x 0,7 metros.
A ABE engadiu que entre o 15 de xullo e o 15 de agosto entregase 1 rasca por cada 10 euros de compra ata un máximo de 5 por cada compra.
En conxunto, sortéanse 1.000 euros en vales de compra. O sorteo levarase a cabo o 17 de agosto.
Coma de costume, toda a información relativa a esta e outras campañas témola na web da ABE, www.abe.gal.
Aproveitando esta campaña a ABE distribuirá entre os seus comercios asociados o material de benvida pola adhesión da ABE á recentemente creada Rede de Comercios e Mercados do Camiño, xurdida ao abeiro do Xacobeo 2021 e destinada a potenciar as ventas do comercio de proximidade nos 138 concellos polos que pasan os Camiños de Santiago, no que Boiro é un deles.
A ABE optou pola vía de integración total dos seus comerciantes, polo que todos os comercios asociados que cumpran as características que marcan a orde (menos de 300 metros cadrados, epígrafe principal de comercio, menos de 50 traballadores…..) forman parte xa “desta enorme rede galega dos comercios do camiño”, en palabras da asociación.
Inicialmente, pola adhesión á rede, os establecementos da ABE recibirán automaticamente e de forma gratuíta o seguinte material: distintivo identificativo para o local, lote de pulseiras, bolsa de caramelos e unha caixa expositora de caramelos.
Esta rede de comercios busca dinamizar e potenciar as ventas, mellorar os servizos aos peregrinos (os comercios poden incluso selar a tarxeta compostelá) e manter no tempo os clientes.
