A dotación de bombeiros do Consorcio Provincial Contra Incendios e Salvamento de A Coruña con base en Boiro retirou outro niño secundario de vespa velutina en fachadas de 2 vivendas en Araño no Concello de Rianxo.
Repítese a situación acontecida hai uns dias cando un veciño foi atacado na súa casa do lugar de Rial, no concello de Rianxo. Afortunadamente o veciño está xa no seu domicilio e non lle quedan danos. O paisano empezaba a limpar o caleiro deste alpendre cando viu achegarse algo que el describe como unha árbore de Nadal. Era o enxame de vespas que aniñaran no pendello sen que ninguén se decatase e que, ao sentírense ameazadas, o atacaron. Recibiu ducias de picadas no corpo e na cabeza.
Primeiro levárono ao centro médico de Rianxo e de alí ao hospital de Santiago, onde o tiveron en observación ata a noitiña, mentres os bombeiros de Boiro retiraban o niño.
Os bombeiros din que os avisos aumentan conforme avanza o desconfinamento.
Precisamente unha dotación de bombeiros do Consorcio Provincial Contra Incendios e Salvamento de A Coruña con base en Boiro retirou outro niño secundario de vespa velutina en Rúa Loureiros no Concello de Rianxo. Lembre que calquera que vexa un niño debe avisar aos teléfonos 012 ou 112.
