O grupo socialista de Ribeira, encabezado por José Vilas, vén de facer chegar ao Concello unha petición relativa á praia do Castro-Catía, entre Castiñeiras e Aguiño, e a necesidade de arranxar os seus equipamentos, visibelmente danados polo uso e as inclemencias do tempo.
En concreto, o PSdG-PSOE pon o foco no mobiliario público realizado pola Escola Illote Noro, no que se inclúen os bancos de madeira e as pasarelas instaladas no paseo da praia. En palabras da agrupación, estas estruturas, de cara á tempada de verán que se achega, precisan “dun mantemento axeitado”.
Respecto dos bancos, o grupo lembra que se trata dunhas doce ou catorce unidade, colocadas á beira do paseo marítimo, no lugar de Areeiros, que “están evidenciando a falta dunha man de pintura”. Por este motivo, os socialistas piden un arranxo urxente dos equipamentos, por parte do departamento que corresponda.
