O grupo socialista de Ribeira, a través do seu voceiro José Manuel Vilas, vén de presentar un rogo relativo ao mobiliario urbano da parroquia de Aguiño para ser tratado no vindeiro Pleno. Segundo fai saber a agrupación, os equipamentos da que é a segunda localidade do concello en termos de poboación requiren unha serie de arranxos e acondicionamentos urxentes, especialmente os bancos e as papeleiras.
Nin o estado deste material nin o seu número, sinala o PsdG-PSOE de Ribeira, “correspóndense co que sería un servizo axeitado para os veciños da parroquia”.
O grupo pide que se incremente a cifra de papeleiras nas vías principais, acompañando as marquesiñas de transporte urbano e incrementando a súa presenza nas zonas de lecer infantís e nos paseos peonís. “Na nosa agrupación”, sinalan, “consideramos estas medidas necesarias, máxime tras a nova circunstancia que nos aconteceu de xeito imprevisto, para así poder depositar elementos usados e/ou consumíbeis e garantir ou previr un pouco máis a nosa saúde”.
En virtude de todo o devandito, os socialistas piden ao grupo de Goberno que se fagan as xestións necesarias para a instalación e reparto de 15 unidades de papeleiras, así como adecuar as xa existentes, na vila de Aguiño.
