O Concello de Porto do Son, co fin de botar unha man ás familias e empresas en materia de xestión de refugallos eléctricos e electrónicos (o que se coñece como material RAEE), vén de convocar unha nova recollida de lixo a domicilio para o vindeiro 7 de xullo. Será unha actividade gratuíta e, para poder tirar proveito dela, só se esixe un único requirimento: contactar cos servizos municipais a través do teléfono 981 867 412 e comunicar o emprazamento exacto onde ten que ser recollido o material.
Segundo sinala o Concello, entran dentro da etiqueta RAEE os seguintes obxectos: televisores, móbiles, teléfonos en xeral, computadores, ferramentas eléctricas, lámpadas, instrumentos de vixilancia de control, aparellos médicos, xoguetes eléctricos, videoxogos, lavadoras, neveiras, microondas, deshumidificadores, máquinas expendedoras, cronómetros, secadoras ou estufas, entre outros aparellos. Tamén se recollen pequenos cascallos de obra doméstica en sacas de até 100 kg.
