O candidato do grupo En Común para a Presidencia de Galicia, Antón Gómez Reino, estivo este martes 23 na Pobra do Caramiñal, participando nun acto electoral coa cidadanía na compaña do alcalde Xosé Lois Piñeiro e máis do número dous da candidatura pola Coruña, Luca Chao. A cita na Pobra significou o inicio da xira de En Común pola xeografía galega. Unha das temáticas que centrou a visita de Gómez Reino foi o sector marítimo e a importancia de pór en marcha medidas eficaces para impulsalo, opostas ás actuais.
Neste senso, o candidato aproveitou a estadía na Pobra para facer un chamamento á poboación do Barbanza para que aposte polo mar, un dos grandes piares históricos da nosa economía e, tamén, un dos sectores con máis futuro. Entroncando con isto, Gómez Reino puxo enriba da mesa algúns dos puntos estrela do seu programa electoral. Por exemplo, achegar un plan integral de saneamento das rías que optimice ao máximo as augas das áreas de marisqueo ao tempo que se incrementan as contornas de explotación e se fai medrar a cifra de permisos.
