Un incendio que comezou nunha bombona de camping gas deixa a tres persoas feridas en Noia.
Ocorreu pouco antes das oito da noite pasada nun domicilio situado na Rúa Pontevedra cando un dos afectados preparaba comida coa axuda dunha pequena equipación de fornelo e bombona. Por razóns que se descoñecen, a bombona esbourou e provocou un pequeno incendio que foron quen de atallar os propios implicados. Sen embargo, neste intento, un dos ocupantes da vivenda sufriu queimaduras nunha man das que foi atendido no propio domicilio. As outras dúas persoas foron trasladadas ao Centro de Saúde da localidade, aínda que cun cadro leve provocado pola situación.
Nada máis recibir o 112 Galicia a alerta sobre este suceso, púxose en marcha un operativo no que participaron os Bombeiros de Boiro e os efectivos do Servizo Local de Protección Civil. Entre todos airearon a vivenda, posto que o lume xa fora sufocado. Tamén contaron coa colaboración dos membros do GES de Brión e dos axentes da Policía Local.
