O pasado 8 de xuño, con motivo do Día Mundial dos Océanos, a asociación ecoloxista ADEGA realizou unha limpeza de praias na na nosa comarca, concretamente nos areais de Cabío e A Corna, na Pobra do Caramiñal e en Palmeira. Os traballos foron realizados polo equipo do departamento de Educación Ambiental de ADEGA, pechados á participación de voluntarios doutras plataformas ou a título individual para poder garantir a seguridade sanitaria durante os labores.
O obxectivo desta xornada e desta actividade foi o de eliminar parte dos residuos que están nas praias así como facer unha chamada de atención sobre o lixo que acaba nos nosos areais e ecosistemas mariños.
ADEGA tamén aproveitou para comprobar a presenza da píllara das dunas nestes areais e cal está sendo a evolución das especies exóticas invasoras.
A maiores, a organización tirou partido da actividade para lanzar unha mensaxe clara contra os actuais modelos de produción: insustentábeis e mal xestionados en materia de residuos. “Todo iso fai que cada ano rematen nos océanos 10 millóns de toneladas de lixo”, explican, poñendo o foco na problemática engadida da actual situación de pandemia, con luvas e máscaras espalladas por todos os recantos das nosas cidades, vilas, aldeas e espazos naturais: “Desde ADEGA cústanos entender como, a sabendas dos riscos que comporta unha mala xestión destes residuos, sigan dándose este tipo de accións irresponsábeis, non xeneralizadas, pero preocupantes. Así pois, a problemática da contaminación mariña acada, se cabe, maior intensidade nestes tempos”.
