Adolfo Muíños e Xusto Ordóñez xuntáronse cos presidentes dos clubs de CCD Taragoña Fútbol, Club Xadrez Rianxo, C.D. Unión de Asados, Club Baloncesto Rianxo – CBRianxo, Club Voleibol Rianxo, Club Remo Rianxo e Club Piragüismo Rianxo-Rianxo.
O obxectivo da reunión era analizar a situación xerada pola crise da COVID19 e as consecuencias que ten no eido deportivo en canto á participación en adestramentos e competicións, as medidas de prevención e seguridade a adoptar, o financiamento das entidades, entre outras. Repasouse a información relativa a cada unha das fases de desescalada e cada club informou das súas intencións e necesidades no futuro inmediato. Un intercambio de ideas positivo que servirá para planificar de xeito axeitado a reincorporación á normalidade.
Tamén se acordou un elaborar unha campaña de apoio ao tecido empresarial local desde os clubs, da man do concello, de xeito que estas entidades poidan devolver e agradecer o apoio que recibe desde este sector en forma de patrocinios e colaboración. As reunións dividíronse en grupos para respectar a normativa. Asistiron á primeira reunión aquelas entidades que forman parte do programa Deporte Base. A vindeira semana farase a reunión cos restantes clubs do concello.