A agrupación Rianxo en Común segue adiante coa súa loita contra as dramáticas consecuencias que ten a pandemia e a crise sanitaria unha chea de sectores, cebándose especialmente nos colectivos sociais e económicos máis vulnerábeis. En base ao seu labor de facer seguimento de cales son os ámbitos nos que se precisan actuacións máis urxentes, o colectivo que coordina Julián Bustelo achegou unha serie de propostas de conciliación para ser tidas en conta na entrada da fase 2 da desescalada, “ante a cada vez maior incorporación dos veciños e veciñas aos seus postos de traballo” e a ante a imposibilidade de retomar o curso escolar a curto e medio prazo.
Estas son as propostas:
➡️ No caso da familias cun meniño de entre 0 e 3 anos, cuxos proxenitores teñen que traballar e non teñen a ninguén na rede familiar co que deixar ao fillo/a, enviaríase un coidador infantil ao domicilio mentres os pais traballan.
➡️ No caso de familias con rapaces e rapazas entre 4 e 12 anos, cuxos pais tamén traballan ambos e non poden deixar os fillos con ningún familiar, “propoñemos a apertura das escolas unitarias ou de outros centros municipais cun monitor infantil que atenda aos nenos e nenas en horario laboral”.
Rianxo en Común opina que estas medidas deberan ser adoptadas de urxencia, e súmanse a outras propostas “que fixemos previamente como a ampliación das axudas municipais para a adquisición de material escolar para loitar contra a fenda dixital”.
