O Partido Popular de Rianxo vén de facer públicas unha serie de peticións e propostas para asegurar a reactivación económica do concello neste proceso de volta á “nova normalidade”, un proceso no que, segundo fan saber, son necesarias “máis axudas para salvagardar o futuro das pemes e máis dos autónomos de Rianxo”. Estas axudas, din, deberan formar parte dun plan socio-económico para botar un man non só ao tecido económico senón tamén ás familias, ás persoas maiores e, tamén, aos colectivos máis vulnerábeis. As medidas foron presentadas por Germán Allut, portavoz do PP rianxeiro.
Os populares entenden que, unha vez superada a primeira fase da pandemia, o Executivo local ten a “obriga” de desenvolver diferentes programas que axuden aos colectivos máis afectados a facer fronte á “complicada” situación persoal e económica que deberán afrontar no futuro.
Allut engade que “con carácter de urxencia” os servizos sociais do Concello e Protección Civil deben proceder a “a determinar que familias atópanse nunha situación de meirande risco para, posteriormente, formar unha mesa de traballo que estableza un protocolo de actuación”. O voceiro do PP rianxeiro sostén que é preciso “saber que familias están a pasalo peor para poder axudalas a través dun menú solidario, do pago de diferentes recibos –auga, lixo, electricidade- e da entrega dun bono para comprar roupa e artigo de primeira necesidade o comercio local”. Allut engade que o plan de axuda debe incorporar tamén o pago des servizos básicos (óptica e servizo de odontoloxía), así como a posta en marcha de cursos de formación para persoas con problemas de insercción laboral.
Por outra banda, o popular tamén se referiu á “importancia” de impulsar o tecido produtivo de Rianxo a través de medidas que teñen que ver coa redución do IBI e do Imposto de Vehículos nun 22% durante o período de emerxencia, así como a eliminación do Imposto de Construción para obras menores solicitadas durante os anos 2021-2022.
O Partido Popular de Rianxo tamén reclama unha redución do 50% para as obras maiores que se executen nos próximos dous anos, a eliminación da taxa de ocupación para os locais de hostalería e a posta en marcha dun plan de obras menores municipal coa mínima documentación legal posíbel.
