O certame Rianxo Streaming Festival, a iniciativa colectiva do Concello para facer voar o talento das veciñas e veciños aproveitando as estadías nos fogares derivadas do Estado de Alarma, segue en activo en tempos de desescalada, xuntando vídeos musicais (individuais ou en grupo), vídeo-creacións, vídeo-experiencias e vídeo-mensaxes de ánimo. Ou sexa, diferentes xeitos de afrontar a crise sanitaria con positivismo.
Esta fin de semana da ponte de maio que vimos de deixar atrás o certame superou a cifra dos 40 audiovisuais. E fíxoo con importantes contribucións, como o vídeo musical de animación Vals das horas, de Aida Saco Beiroa (composición e piano), Joseba Plazuello (vídeo) e Ángel Ramallo (gravación e mestura); ou coa xuntanza online das e dos integrantes da Banda da Escola de Música de Rianxo, que celebrou o seu 17 aniversario en corentena achegando un vídeo que xa anda preto das 1.500 reproducións.
O certame
O Concello de Rianxo quixo pór o seu gran de area para facer que o confinamento da veciñanza fose estes días o máis levadeiro posíbel. Por esta razón, puxo en marcha un certame de creación de “contidos dixitais contra aburrimento na corentena”, o Rianxo Streaming Festival. O obxectivo é converter en fervedoiro de talento e participación a reclusión forzosa da xente nos seus fogares derivada do estado de alarma para frear o espallamento do andazo de COVID-19.
Co gallo do festival poderase presentar todo tipo de contribucións dixitais: música, contos, monólogos, divulgación, etc. Este material está a ser publicado na canle de YouTube ou compartidos nas propias redes sociais co cancelo #RXtreaming. “O noso obxectivo non é outro que combater o aburrimento e fomentar a creatividade, ao tempo que reforzar o sentimento de pertenza a unha comunidade veciñal tan activa como a rianxeira”, explican dende o Concello, debullando os pasos para participar no certame.