O PBBI reprocha o alcalde que non os inclúa na negociación do plan marco de reactivación económica de Ribeira. Di que unicamente se conta con Psoe, BNG e Suma Ribeira

O Partido Barbanza Independente ( PBBI) nun comuniado reprochoulle esta tarde ao alcalde de Ribeira, Manuel Ruiz, que negocie o plan marco Reactiva Ribeira, de reactivación da economía local, unicamente cos cinco concelleiros do BNG, PSOE e SumaRibeira, omitindo de maneira intencionada ao grupo municipal maioritario da oposición. O seu portavoz, Vicente Mariño de Bricio, manifestou que despois de manter a semana pasada unha reunión cos edís desas tres formacións políticas, sen contar co seu partido, agora convoca ao PBBI para dar o visto e prace a unha política de feitos consumados, da que din non estar dispostos a participar.

Mariño de Bricio puntualizou que o alcalde de Ribeira non quere escoitar as súas propostas presentadas hai uns días, cunha serie de medidas que califican de “moi razoables”. O PBBI solicitou a aplicación durante un período mínimo de seis meses dunha rebaixa do 25% nos salarios e as dietas dos integrantes do equipo de goberno e tamén das dietas e asignacións a grupos políticos e pola asistencia a calquera comisión e plenos cunha duración mínima de seis meses, así como a redución das dedicacións exclusivas a tres persoas e eliminación da totalidade das dedicacións parciais “que consideramos superfluas”. O PBBI pediu tamén a bonificación nas taxas polo abastecemento de auga e da recollida de lixo do 100%, dos afectados polo peche, que se aplicará durante o período que comprenda o peche obrigatorio establecido polo real decreto do estado de alarma. A todo iso, e en vista da campaña reivindicativa desenvolvida pola hostalería local, o partido encabezado por Vicente Mariño pide a exención das taxas das terrazas da hostalería durante un ano.