O Concello de Rianxo vén de lanzar un spot para pechar fileiras arredor dos establecementos e empresas locais e para encher as redes sociais de mensaxes en positivo arredor das vantaxes de actuar, en materia de compras, en clave de proximidade. O vídeo Rianxo xuntos por un novo comezo, de 25 segundos de duración, foi lanzado esta fin de semana e xa acumula preto de 400 reproducións. Forma parte campaña do Concello Merca no Comercio Local, Agora máis ca nunca, un chamamento á cidadanía para que pór de relevo as vantaxes de mercar nos establecementos das e dos veciños e de investir localmente.
En palabras do Concello, “mercar no comercio de proximidade é a mellor forma de previr a crise económica e xerar riqueza que repercuta no termo municipal, na veciñanza, no tecido comercial e tamén no social”. O Goberno rianxeiro lembra que cando tantas outras cousas semellaban ir fallando, “o comercio de proximidade estivo aí para nós durante a crise sanitaria”, polo que “a mellor forma de agradecérllelo é mercando nas súas tendas e contratar os seus servizos”.
