A crise sanitaria e económica solucionarase en boa medida se apostamos polo comercio local do noso concello e de proximidade. Esta é a base da campaña que vén de lanzar o Concello de Rianxo, Merca no Comercio Local, Agora máis ca nunca, un chamamento á cidadanía para que peche fileiras arredor dos establecementos das e dos veciños e, tamén, un recordatorio das vantaxes de investir localmente.
Vantaxes como por exemplo a confianza que se xera entre vendedores e clientes, a posta en xogo de importantes investimentos para a vila, a creación de emprego, a xeración de riqueza e os recursos que se activan para revitalizar o sector produtivo en relación coa crise económica e sanitaria.
En palabras do Concello, “mercar no comercio de proximidade é a mellor forma de previr a crise económica e xerar riqueza que repercuta no termo municipal, na veciñanza, no tecido comercial e tamén no social”. O Goberno rianxeiro lembra que cando tantas outras cousas semellaban ir fallando, “o comercio de proximidade estivo aí para nós durante a crise sanitaria”, polo que “a mellor forma de agradecérllelo é mercando nas súas tendas e contratar os seus servizos”.
