O Concello de Boiro abre desde luns 11 de maio as oficinas xerais para o rexistro e padrón municipal de habitantes, coincidindo coa apertura do prazo de presentación de solicitudes de matrícula nos centros educativos. Segundo informou o Goberno local, as oficinas estarán abertas de luns a venres de 9.00 a 13.30 horas e seguiranse as medidas de seguridade co persoal municipal e tamén cos usuarios.
A medida, como dixemos, coincide co inicio do prazo (até o 18 de maio) para a admisión nos centros escolares para o curso 2020/21 no que se refire a aquelas persoas que non a puideron presentar no período ordinario do mes de marzo ao verse suspendido polo Estado de Alarma. Este prazo foi aberto este luns pola Consellería de Educación.
De xeito complementario, desde este 11 de maio fica aberto tamén o rexistro do Concello de Boiro para atender estas demandas e solicitudes. Respecto das medidas seguridade, o Goberno local fixo unha redistribución do espazo das oficinas e dotou as mesmas de mamparas protectoras e de limitacións do espazo para garantir a distancia de 2 metros entre persoas. O acceso ao Consistorio, ademais, está limitado exclusivamente para este fin e para entrar é preciso desinfectar as mans e usar máscara, a disposición dos usuarios na entrada.
O Concello lembra que os demais departamentos “seguen a funcionar con normalidade”, igual que durante todo o Estado de Alarma, pero sen atención presencial, so telemática e telefónica. Desde o Goberno boirense recomendan que se lles dea prioridade aos trámites telemáticos ou telefónicos sempre que sexa posíbel.
