A Zona Comercial A Martela de Rianxo inicia unha nova andaina promovendo as vantaxes de mercar localmente

A agrupación de empresarios da Zona Comercial A Martela de Rianxo vén de emitir un comunicado no que informan do regreso paulatino á actividade das e dos seus integrantes, unha volta á “nova normalidade” que, segundo fan saber, “encárase con ilusión pero tamén con moita inquietude ante a difícil situación pola que estamos a pasar”, unha situación que están convencidas/os de que será máis doado afrontar en colaboración e de xeito colectivo. Con ese obxectivo, inician unha nova etapa que arrinca cun cambio de imaxe e cunha serie de accións complementarias, como un sitio propio en Facebook e medidas de sensibilización acerca das vantaxes de mercar localmente.

“A nosa intención”, explican, “é impulsar a plataforma Somos Rianxo coa finalidade de acoller aos distintos establecementos comerciais do municipio (pequeno comercio, bares, servizos…) e potenciar a visibilidade dos negocios locais”. Ao mesmo tempo, a agrupación mostrou o seu obxectivo de concienciar á veciñanza “da importancia de manter vivo o noso tecido empresarial e comercial, particularmente o pequeno comercio, pois é un sector do que depende boa parte do emprego local e que sustenta a vida social do municipio”.

Na súa páxina de Facebook a entidade achegará información continua e actualizada das actividades que realiza e, tamén, visualizará o diferentes establecementos do municipio para “que sexa un punto de encontro e para traballar entre todos para superar a difícil situación que estamos atravesando”.