A biografía máis completa de Castelao, premiada na Gala do Libro Galego

11 Maio 2020

Presentación do libro, nun concorrido acto previo á crise sanitaria

Castelao volveu ser protagonista do mundo editorial galego. E foino grazas ao historiador Miguel Anxo Seixas, que fixo a que sería a biografía máis extensa do escritor, ilustrador e político rianxeiro, un ambicioso achegamento á súa obra, á súa vida e ao seu legado que vén de ser recoñecido como mellor iniciativa bibliográfica nos Premios do Libro Galego. A obra é unha publicación co-editada polo Consorcio de Santiago e a Editorial Galaxia.

Os Premios Gala do Libro Galego é unha iniciativa da Asociación Galega de Editoras, Asociación de Escritores e Escritoras en Lingua Galega e a Federación de Librarías de Galicia. O xurado da quinta edición dos premios, cos que se pretende recoñecer a excelencia do traballo realizado no eido editorial ao longo de 2019 en Galicia, celebrou esta fin de semana unha reunión telemática para dar a coñecer os galardoados deste ano.

Na modalidade de iniciativa bibliográfica resultou gañadora a obra Castelao. Construtor da nación. Tomo I 1886-1930, a primeira parte da biografía do intelectual galeguista escrita polo historiador Miguel Anxo Seixas Seoane como resultado da súa tese de doutoramento e que terá continuidade noutros dous tomos. É, como dixemos, unha coedición do Consorcio de Santiago e a Editorial Galaxia.

1.331 páxinas

Ao longo das súas 1.331 páxinas recóllese a vida de “o meniño rianxeiro, o rapaz emigrante e retornado, o debuxante e o pintor autodidacta, o médico entregado, o ilustrador que se vale dos debuxos de humor para concienciar os galegos, o funcionario, o profesor de debuxo, o membro das Irmandades da Fala, o escritor e artista”. Segundo informou o Consorcio de Santiago, trátase do primeiro volume dunha “biografía monumental”, concibida por Miguel Anxo Seixas case coma un diario da vida cotiá de Castelao, cos fitos da súa cronoloxía persoal e pública, xunto á actualidade da época. Ademais, o libro ilústrase con fotografías que mostran diferentes momentos da súa traxectoria.

O Consorcio engade que esta publicación “é o resultado do labor de toda unha vida dedicada á investigación, á recollida de datos e documentación ao redor da figura de Castelao”. Neste senso, o traballo tivo moi de pescuda de investigación, mostrando aspectos ignorados ou esquecidos do autor rianxeiro para “tentar facer esa biografía que aínda estaba pendente de chegar no noso panorama editorial”. Nesta liña, o autor lembrou que estivo vetado pola ditadura ata 1975 e en parte oculto ata 1984.

Este primeiro volume, que vai de 1886 a 1930, recolle as orixes da súa familia (inclúe unha árbore xenealóxica dos Rodríguez e dos Castelao), o seu nacemento en Rianxo, a realización do Bacharelato en Compostela, os seus estudos de Medicina (durante esta etapa foi guitarrista e caricaturista da Tuna), a súa mocidade, os seus primeiros encontros coa pintura, a escritura e a ilustración, a súa familia, as súas incursións como actor, a súa vida política, as viaxes ou a morte do seu fillo, entre outras vivencias. A este volume seguiranlle outros dous, que van de 1931 a 1939 e de 1940 ata o seu falecemento en 1950.

Outros artigos

Publicidade

Revista en papel

Opinión

“A vivenda” – José Manuel Pena

“A vivenda” – José Manuel Pena

É un ben de mercado para o negocio particular ou un dereito básico, fundamental e humano, como pode ser a educación, a sanidade, a prestación por desemprego ou a xubilación? A vivenda, en Galicia e no resto de España, continúa sendo un negocio e un ben de...