A operadora de telecomunicacións de Ribeira, Toxo Telecom, vén de achegar un importante gran de solidariedade á loita contra a pandemia de COVID-19 e á protección dos colectivos máis vulnerábeis fronte ao avance do coronavirus. Segundo puidemos saber, a solidariedade de Toxo materializouse, entre outras medidas, na doazón de 260 máscaras FFP2 KN95 ao Hospital de Barbanza.
O material subministrado foi conseguido grazas ás contribucións de todo o equipo de traballadores de Toxo Telecom, ás que se sumaron tamén os propios clientes da operadora. A empresa agradece aos traballadores e aos usuarios dos seus servizos o significativo gran de area que veñen de xuntar á loita global contra a proliferación da pandemia.
A esta doazón da operadora cómpre engadir o traballo desinteresado e solidario desenvolvido pola empresa para equipar con conexión a Internet os computadores do banco de material informático que se leva días mobilizando en Ribeira para permitir a teledocencia entre as familias en risco.
