O Consistorio de Ribeira acolleu hoxe a acostumada (dende que comezou o Estado de Alarma) sesión diaria da Comisión de Seguimento de Evolución do COVID-19, que serviu, unha vez máis para facer balance das actuacións que se desenvolven e para acordar medidas novas a realizar. Polo que respecta ao balance, informouse de que os servizos de emerxencias do Concello, coa axuda do voluntariado de Protección Civil, segue a coordinar a distribución de alimentos e materia diverso de protección co “obxectivo de favorecer a prevención na loita contra o coronavirus no municipio”.
Segundo se informou na sesión, as organizacións de Cáritas correspondentes a Ribeira, Palmeira e Aguiño, ICE Renovación, a concesionaria de limpeza Urbaser e máis o Servizo de Atención Domiciliaria depende dos Servizos Sociais foron beneficiarios nas últimas horas destas axudas. En concreto, Cáritas Ribeira, Cáritas Aguiño e ICE Renovación recibiron alimentos, mentres que a Urbaser lle foron entregadas 5 pantallas protectoras e 50 máscaras cirúrxicas que se suman a outra remesa previa de materia entregado as semanas pasadas.
Tamén se doaron máscaras a Cáritas Ribeira.
No capítulo de agradecementos polas contribucións solidarias de empresas e entidades, a Comisión tamén agradeceu as achegas desinteresadas da conserveira Ignacio González Montes (3 palés de latas de conservas), Baldomero Fariña (máscaras), Teresa Confeccións (máscaras) e Sálvora C.F. (alimentos).
Respecto das novas iniciativas, fíxose fincapé na redución ou na devolución prorrateada dunha serie de taxas e prezos públicos por usos e servizos que non poden ser prestados durante o Estado de Alarma. Son os seguintes:
• Taxa pola ocupación de terreos de uso público con mesas e cadeiras con finalidade lucrativa.
• Taxa pola ocupación de terreos de uso público con postos de venda ambulante.
• Prezo público pola prestación de servizos e realización de actividades da Oficina Municipal de Deportes.
• Taxa pola prestación do servizo do centro de atención á primeira infancia.
• Taxa pola prestación do servizo do Conservatorio Municipal de Música.
• Prezo público pola prestación de servizos culturais.
Denuncias
Por último, a Policía Local de Ribeira dou conta de tres novas denuncias nas últimas 24 horas a cidadáns que vulneraron o confinamento.
