A sesión deste luns 20 de abril da Comisión Municipal de Seguimento da Evolución do COVID-19 do Concello de Ribeira serviu para presentar unha innovadora iniciativa (no contido e tamén na forma) de capacitación para incrementar a empregabilidade e a formación da veciñanza nestes tempos de crise sanitaria e confinamento. Trátase do programa online Casa-Talentos, impulsado polo Goberno ribeirense para botar unha man, con coñecemento e recursos avanzados, na vindeira reactivación económica post-COVID. Daráselles prioridade ás veciñas e veciños en desemprego ou que estean afectados directamente polo Estado de Alarma, como por exemplo autónomos ou profesionais que foran obxecto dun ERTE.
O programa Casa-Talentos estará formado por un total de 83 cursos posíbeis distribuídos en 20 temáticas: idiomas, programación e redes informáticas, sistemas e bases de datos, deseño gráfico e 3D, saúde e nutrición, sanidade, industria alimentaria, enerxía, medio ambiente, administración de empresas, ofimática Microsoft Office, loxística, xestión comercial e marketing, industria química, actividades deportivas, prevención e igualdade, turismo, limpeza e xestión de residuos.
Poderán acceder a este programa gratuíto ata mil cidadáns.
Dende o Concello xa se está traballando para acabar de perfilar esta iniciativa (este luns 20 de abril deus conta da mesma na Comisión Municipal de Seguimento da Evolución do COVID-19) e anunciar e iniciar o pertinente prazo de inscrición.
Solicitudes ao Goberno central
Ademais, no seo da Comisión acordouse realizar dúas solicitudes ao Goberno do Estado: por unha banda, a rebaixa ao 4% do IVE para a adquisición de material de auto-proteción (preferentemente máscaras) e, doutra, a inclusión da hostalería no plan de “desescalada” por medio de medidas correctoras para garantir unha maior seguridade (aforos, distancias, etc.). A este respecto e con esta intención, o Concello ten previsto facilitar no que resta de 2020 unha maior ocupación de vía pública con terrazas da que actualmente se permite.
Tamén se explicou na Comisión que xa concluíu o reparto de máscaras por cinco parroquias (Corrubedo, Olveira, Oleiros, Artes e Castiñeiras) e este luns 20 estase a continuar por Carreira.
Denuncias
A Comisión lembrou que no transcurso da fin de semana houbo dez denuncias por incumprir a obriga de confinamento, tres das cales foron reincidentes, e houbo sete requirimentos polo mesmo motivo.