O sector turístico e a Deputación da Coruña buscan solucións contra a crise nun foro online

27 Abril 2020

O turismo, como tantos outros sectores estes días, ou se cadra máis, está a empregar as redes durante o Estado de Alarma para facerse forte, compartir experiencias e incrementar a súa competividade e transformación con vistas á futura volta da normalidade. Esta foi a base do Foro Turismo COVID-19, que comezou hoxe, da man da Deputación da Coruña (Turismo da Deputación) co obxectivo específico de “analizar a situación e as posibilidades de futuro deste ámbito de especial relevancia para o desenvolvemento económico”.

No foro, cuxo programa de actividades é un programa cen por cen online, participan xa ducias de representantes do noso sector: persoal técnico, empresas, responsábeis de entes de xestión, xornalistas e demais profesionais. Unha das conclusións ás que se chegou este luns 27 é o convencemento común nas vantaxes de crear máis colaboración entre o sector público e privado. Está en xogo, dixeron, a recuperación do turismo.

No encontro, definiuse a situación provocada pola pandemia como “catastrófica” e de grande “incerteza” para o sector pero tamén se destacaron as potencialidades do territorio para a futura recuperación que residen na aposta por un turismo sustentábel, de calidade, seguro e de proximidade.

Coordinada polo responsábel da área de Turismo da Deputación da Coruña, Xosé Regueira, a primeira das xornadas do foro foi clausurada polo presidente do ente provincial, Valentín González Formoso, que defendeu a necesidade de estreitar a colaboración público-privada para remontar “a gravísima crise que suporá tamén unha gran perda de emprego e diminución de consumo que afectará tamén de maneira directa ao turismo”.

A xerenta do Consorcio de Turismo de Coruña, Lanzada Calatayud, o técnico da Reserva da Biosfera A Coruña e as Mariñas, o xerente da Mancomunidade Concellos da Comarca de Ferrol, Lucho Alcalá, o presidente da Asociación de Turismo Muxía Natural, Manuel Jesús Lema, o representante da Asociación da Ría da Estrela de Muros e Noia, Sebastián Valverde e a xerenta de Turismo de Santiago de Compostela, Flavia Ramil foron as persoas que participaron na primeira sesión do foro moderada polo empresario do sector da hostalaría e profesional da comunicación, Pepe Formoso.

O encontro continuará o vindeiro xoves 30 abril ás 18h cunha sesión sobre os concellos no novo contexto do sector turístico.

Outros artigos

O novo Auditorio de Ribeira abrirá o sábado 1 de xuño

O novo Auditorio Municipal de Ribeira abrirá as súas portas o sábado 1 de xuño e para celebrar a súa apertura, a Concellería de Cultura está a organizar unha programación especial que se estenderá ao longo de todo o mes. Esta coincidirá co "Xuño dá Cultura e as...

+

Publicidade

Revista en papel

Opinión

“Oporto”. Alberto Barciela

“Oporto”. Alberto Barciela

Oporto puede seguirse en el sentido serpenteante de un río, o en la vertical de un océano, ascenderse o descenderse por meandros encajados en calles que a veces semejan acantilados, que siempre se precipitan hacia agua, una urbe universal cerca del tiempo que le tocó...