No medio da crise sanitaria, os certames artísticos que tiñan abertas convocatorias víronse obrigados a modificalas para adaptalas á nova situación, co fin de garantir o que sería un desenvolvemento desexábel e normal do certame. Un exemplo disto é que acontece coa nova edición, a XI, do Premio Atlante de Gravado, impulsado pola Fundación Museo de Artes (Ribeira), cuxa nova convocatoria abriuse na recta final do pasado ano e cuxo remate de prazo, se ben estaba previsto para o 31 de maio, tivo que ser adiado (por mor da pandemia e o Estado de Alarma) até o 30 de xuño. Podemos consultar esta actualización e as bases remodeladas na web do prestixioso museo ribeirense.
O Premio Atlante de Gravado do Museo de Artes establece a seguinte serie de recoñecementos: o Premio Ramiro Carregal de Gravado de 5.000 euros, tres premios dotados con 2.500 euros cada un e outro premio especial Pedras de Santiago, de 2.000 euros, para un artista nacido ou residente en Galicia.
O xurado estará composto por Manuel Ayaso, pintor e gravador; José Daniel Buján, director da Biblioteca de Galicia; Alfonso Costa, pintor e gravador; Carmen Hermo, doutora en Belas Artes e gravadora; Juan Monterroso Montero, decano da Facultade de Xeografía e Historia da Universidade de Santiago de Compostela; José Manuel López Vázquez, catedrático da Facultade de Xeografía e Historia da Universidade de Santiago de Compostela; e Isabel Pintado, gravadora e docente.
