A Policía Local de Rianxo, ao abeiro das funcións encomendadas ao corpo en coordinación coa Garda Civil de Rianxo e a BRILAT (Operación Balmis para garantir o cumprimento do Decreto de Alarma), proseguiu os días pasados co desenvolvemento de controis estáticos e móbiles en todos os recantos do territorio municipal para verificar que os desprazamentos de peóns nas rúas e de vehículos nas estradas obedece só a causas perfectamente xustificadas. Segundo informou no seu balance puntual a Policía Local, até o de agora foron interceptados, identificados e verificados 1.995 vehículos, identificadas 483 persoas en vía pública e efectuadas 92 denuncias administrativas.
Amais, instruíronse dilixencias policiais en relación cunha persoa que estaba “sendo investigada” por incumprir as medidas de confinamento e que acumulaba 10 denuncias anteriores. Finalmente foi condenada polo penal en xuízo rápido por desobediencia grave.
Segundas residencias
Entre os días 8 e 12 de abril establecéronse dispositivos “gaiola” en colaboración coa Garda Civil de Rianxo e a Agrupación de Tráfico da Garda Civil destinados a controlar o tránsito de vehículos e persoas a lugares de vacacións, verificándose 265 vehículos e os seus ocupantes, e identificándose 60 viandantes, dos que se pescudaron os motivos da súa presenza en vías e espazos públicos. Estes labores saldáronse con denuncias a dúas persoas residentes habituais en Ourense e Barcelona, respectivamente, e que, segundo informa Policía Local de Rianxo, “pretendían trasladarse a segundas residencias”.
Sustancias estupefacientes
Os axentes rianxeiros tamén informaron de que nos controis e identificacións efectuadas procedeuse ademais a 4 comisos de diversas cantidades de sustancias estupefacientes (marihuana, cocaína e heroína) sendo denunciados os posuidores das mesmas por vía administrativa.
En materia de inspeccións a vehículos foron denunciados 7 condutores por dar positivo en drogas ou alcoholemia.
Labor solidario
Por outra banda, Policía de Rianxo sinalou que dende o inicio do Estado de Alarma foron atendidos 1.149 requirimentos de información ou asistencia á cidadanía, prestouse auxilio (en colaboración co persoal de servizos sociais de Rianxo e outros departamentos do Concello) en 15 ocasións a persoas en estado de vulnerabilidade, repartíronse en colaboración con empresas cerca de 8.000 máscaras e efectuáronse (polo persoal de obras do concello coa colaboración do Parque de Bombeiros de Boiro) 25 desinfeccións diarias nas vías e instalacións estratéxicas, de servizos públicos, centros sanitarios e inmediacións de espazos comerciais.
