A mostra A rebeldía dunha sensibilidade sobre Manuel Antonio pódese visitar virtualmente

Os nosos museos están a despregar estes días un amplo abano de recursos e propostas para permitirnos visitas e experiencias sen saír da nosa casa. Por exemplo a que nos chegou estes días (vía a Biblioteca Municipal de Rianxo) da man da Biblioteca da Cidade da Cultura de Galicia, que nos convida á versión virtual da mostra A rebeldía dunha sensibilidade do poeta rianxeiro Manuel Antonio,que xa tivemos ocasión de coñecer hai anos, presencialmente, pero que agora vén co engadido extra de volver nestes tempos de confinamento, de ser unha exposición innovadora que sortea as restricións á actividade presencial e de contribuír máis ca nunca á transformación do autor de De catro a catro en escritor universal.

A mostra xira arredor da importancia para as nosas letras e para a literatura de todos os tempos e xeografías do poemario De catro a catro de Manuel Antonio, que marca o punto de partida da exposición A rebeldía dunha sensibilidade. A exposición recolle tanto a súa obra orixinal como versións noutras linguas, estudos realizados da mesma, carteis, material fonográfico…