Os libros xogan un papel fundamental neste período de confinamento, e as librarías, malia ter as portas pechadas, sábeno ben. Este poder curativo das novelas, dos relatos, dos poemas, do teatro e dos ensaios está a levar ás librarías a sortear as restricións da crise sanitaria para achegarse ás lectoras e lectores e facerlles recomendacións axeitadas para mitigar a reclusión ou, tamén, para vender produtos de xeito anticipado. Entre as librarías da comarca que seguen en activo malia os atrancos presentes, mantendo comunicación coa veciñanza nas redes atópase a Libraría Ben de Rianxo, á que podemos visitar, virtualmente, nas súas canles de Facebok e YouTube, onde os seus vídeos con recomendacións acadan xa centos de visitas e comentarios.
Nestas contribucións (as chamadas “recoBENdacións”) podemos atopar un primeiro capítulo destinado ás crianzas de entre 3 e 6 anos de idade, ás que a libraría rianxeira recomenda un máis que destacado feixe de lecturas, entre as que se atopan A pota que trota ou A miña profe é un mostro. Co gallo do Día do Libro, o pasado 23 de abril, a libraría lanzou outro vídeo con 10 consellos literarios (dez títulos concretos) para celebrar a xornada e, por suposto, para mitigar na medida posíbel este tempo de confinamento do que, por certo, xa comezamos a albiscar o inicio do seu remate.
