O Museo Valle-Inclán da Pobra do Caramiñal vén de poñer en marcha unha iniciativa coa que descubrir, desde a casa e xuntos, arte e cultura a través dunha sorte de coleccionable ou de colaboración diaria inspirada para poñer en valor a figura de Ramón del Valle-Inclán.
Así, mentres dure a actual situación sanitaria, cada xornada abrirase a colección patrimonial para ofrecer unha escolma dos seus fondos, converténdose así nun Museo virtual para un público non presencial.
A actividade comeza mañá e as persoas interesadas poderán seguila a través do Facebook de Turismo A Pobra do Caramiñal e da páxina web www.apobra.gal.
Desde a institución agradecen a colaboración do persoal municipal que se compromete a levar adiante esta actividade e tamén aos titulares do dereito de propiedade intelectual das imaxes por facilitar a súa distribución.