Rianxo vai celebrar esta fin de semana con música reivindicativa e cos últimos capítulos locais do Entroido 2020. O primeiro vai vir da man da Escola de Música de Rianxo, que ofrece, na Sala Arcos Moldes do Auditorio, un concerto para celebrar o Día Internacional da Muller. A actuación será o sábado ás 19.00 horas, a cargo dos ensembles do centro docente rianxeiro. Pola súa banda, a festa de Entroido virá da man da veciñanza de Taragoña, que, por mor do mal tempo, tivo que aprazar o seu Desfile de Carrozas de finais de febreiro para o 7 de marzo, a partir das 17.00 horas no Campo de Pazos.
O concerto
A Escola de Música de Rianxo celebra este sábado o Día da Muller Traballadora. No recital participarán diversas agrupacións (ensembles) da Escola de Música de Rianxo. A cita será o sábado 7 de marzo ás 19.00 horas no Auditorio Municipal, véspera da dita conmemoración mundial (oficialmente o 8 de marzo). Tanto unha actividade como a outra veñen da man da Escola de Música en colaboración co Concello, contando co apoio económico da Deputación da Coruña.
O desfile
O tradicional Desfile de Carrozas que organiza cada Entroido a veciñanza de Rianxo (acompañado dun completo programa de música tradicional, de obradoiros e de inchables), celébrase finalmente este 7 de marzo. As actividades comezarán ás 17.00 horas no adro da Igrexa, onde se concentrarán as carrozas que logo sairán cara o Campo de Pazos. Haberá premios en metálico ás tres mellores contribucións artísticas (e agasallos a todas as participantes), música tradicional a carto de Estroupele e Lusco e Fusco, obradoiros, inchables, globofexia e obradoiros de maquillaxe facial.
