José Manuel Pena, voceiro de Stop Deshaucios Barbanza, achegounos un comunicado no que expresa a su preocupación pola elevada taxa de sanitarios contaxiados durante a crise actual do COVID-19, un número que ascende aos 5.000 profesionais afectados en todo o ámbito estatal, douscentos dos cales atópanse en Galicia. Segundo apunta Pena, a posíbel causa disto habería que rastrexala na escaseza de equipos de protección individual no ámbito da sanidade pública, tal e como apuntou o Centro de Coordinación de Alertas e Emerxencias.
No comunicado, que xa obtivo resposta da Dirección Xeral de Saúde Pública (SERGAS), ponse o foco no estado de alarma constante no que traballa o noso persoal sanitario, “un constante temor e unha psicose permanente derivada da posibilidade real do contaxio”, de aí a importancia de axilizar a entrega, na maior brevidade posíbel, deste tipo de material de protección para evitar máis situacións de risco entre os profesionais e, á vez, nos seus círculos de familiares.
Na resposta do SERGAS, o servizo autonómico explica que “é consciente da importancia dos traballadores da saúde como primeira liña de contención da pandemia e de atención aos cidadáns doentes, por iso, agora e empresa, facemos un gran esforzo por protexelos e dotalos do material necesario”. O SERGAS lembra que “está a facer todo posíbel por protexer o persoal e os sectores de meirande risco, como a xente maior”.
