A Escola de Música de Rianxo vai organizar a partir deste mes de marzo a cuarta edición do seu Ciclo de Novos Intérpretes, un programa de actuacións con novas promesas locais que achegará recitais até o vindeiro outono e cuxa anterior edición rematou en decembro, no Auditorio Municipal, cun destacado concerto de Aldara Muíños ao clarinete acompañada polo Trío Céfiro. En total, o novo ciclo de 2020 achegará ao público da comarca cinco relevantes actuacións de música de cámara. O primeiro será este 20 de marzo, cunha cita con Diego Mata, ao piano, e Lucía Mata, ao fagot.
O día 17 de abril será a quenda de Óscar Vázquez, ao trombón baixo, Arturo Rúa, ao piano acompañante.
O 29 de maio actuará a arpista Alba Franco e, xa en outono, o 23 de outubro, será a quen da de Víctor Bouzas, á trompeta, e Alejo Amoedo, piano acompañante.
O ciclo rematará o 20 de novembro con Bernal Muíños, ao saxofón.
O programa vén da man da Escola de Música de Rianxo e conta coa colaboración do Concello e con financiamento da Deputación.
