O Concello de Boiro atópase adoptando novas medidas co obxectivo de velar pola seguridade da cidadanía fronte ao COVID-19. Neste senso, o luns incorpóranse tres auxiliares de Policía Local para reforzar o cadro de persoal dos axentes.
Dito persoal pertence á lista de contratación de auxiliares de 2018 e 2019. Estarán prestando servizo mentres non se remate o proceso selectivo correspondente a este ano, o cal xa estaba en marcha e se tivo que suspender por causa do coronavirus. Todos eles compren, segundo manifestan, os requisitos de formación e, dous deles, xa traballaron en Boiro.
Cómpre lembrar que a Policía Local está intensificando os controis no municipio para garantir que se cumpra o Estado de alarma. Entre outras accións, os axentes están acrecentando as medidas para informar a toda a poboación das restricións marcadas polo Goberno central, ben sexa por megafonía ou colocando carteis informativos en tódolos accesos a praias, parques infantís, paseos, etcétera.
Así mesmo, o corpo policial está incidindo nas medidas de seguridade facendo controis á veciñanza que se despraza en vehículos para ir ao traballo ou á compra. As autoridades insisten nas restricións pautadas polo Goberno central, pois estes movementos deben ser por causas de extrema necesidade, así como individuais agás para o acompañamento de persoas dependentes, entre outras excepcións. Tamén fan especial fincapé en informarse sempre de fontes oficiais sobre o que se pode facer ou non durante o Estado de alarma.