O alcalde de Rianxo, Adolfo Muíños, vén de subir un vídeo no Facebook do Concello no que se dirixe ás veciñas e veciños para enviarlles unha clara mensaxe de ánimo con respecto ao novo período de restricións, confinamento e limitacións que comeza esta semana, da man do novo decreto do Estado de Alarma e das medidas destinadas a frear a pandemia do COVID-19.
No vídeo, o rexedor lembra que esta nova etapa de restricións económicas, empresariais e sociais é de especial importancia, e que supón un último e decisivo esforzo para superarmos entre todas e todas a crise sanitaria, “un esforzo necesario de illamento”. Muíños tamén ten palabras para agradecer e salientar a resposta das veciñas e veciños de Rianxo ante o espallamento da pandemia e a activación das ditas medidas, ao tempo que enxalza o labor do persoal sanitario e de todas as persoas que están contribuíndo a manter a cadea alimentario e o subministro de bens de primeira necesidade.
